मिडिया काउन्सिल विधेयकसहित सञ्चार बिरोधी ऐन कानूनहरुको बिरोधमा हेटौंडामा शनिबार बिहान पत्रकारहरुले बिरोध प्रर्दशन गरेका थिए ।
नेपाल पत्रकार महासंघ ३ नम्बर प्रदेश समितिको आयोजनामा हेटौंडाको बुद्ध चोकमा मानवसाङ्लो प्रर्दशन गरी उनीहरुले बिरोध गरेका हुन् । मानवसाङ्लो प्रर्दशनमा सहभागि पत्रकारहरुले मिडिया काउन्सिल विधेयक फिर्ता गर, प्रेस स्वतन्त्रताको सम्मान गर, पूर्ण प्रेस स्वतन्त्रता ग्यारेन्टी गर लगायतका प्लेकार्ड बाकेका थिए ।
बिरोध प्रर्दशनपछि बोल्दै नेपाल पत्रकार महासंघ ३ नम्बर प्रदेश समितिका अध्यक्ष प्रताप विष्टले मिडिया बिरोधी ऐन कानूनहरु नसच्चिएसम्म संघर्ष जारी रहने बताए ।
‘हामी सत्ताको भजन गाउँदैनौ, समाचार लेख्छौं’, उनले भने, ‘समाचार लेखेर खान समेत नपाउने अवस्था आउनु दुखद कुरा हो ।’ प्रर्दशनीमा हेटौंडाका पत्रकारहरुको सहभागिता रहेको थियो ।
हेटौंडा, २५ जेठ